मुंबई : राष्ट्रवादी काँग्रेसचे नेते आणि माजी मंत्री हसन मुश्रीफ यांची मनी लाँडरिंगप्रकरणी शुक्रवारी (ता. २४) ईडीकडून चौकशी करण्यात आली. त्यासोबतच हसन मुश्रीफ यांचे चार्टर्ड अकाऊंटंट महेश गुरव यांचीही चौकशी करण्यात आली.
यावेळी मुश्रीफ आणि गुरव याना समोरासमोर बसवून चौकशी करण्यात आली असल्याची माहिती मिळत आहे. गुरव शुक्रवारी सकाळी ईडी कार्यालयात पोहोचले. गुरव यांनी अटकपूर्व जामिनासाठी कोर्टात धाव घेतली होती. त्यावर सुनावणी सुरू आहे.
कोल्हापूरमधील कागल विधानसभा मतदारसंघाचे आमदार हसन मुश्रीफ यांच्याविरोधात आर्थिक गैरव्यवहाराप्रकरणी गुन्हा दाखल करून ईडी तपास करत आहे. ईडीने मुश्रीफांच्या घर, कार्यालयावर छापे टाकले होते. त्यानंतर ईडीच्या मुंबईतील कार्यालयात चाैकशीला हजर राहण्यासाठी त्यांना समन्स बजावले होते. मुश्रीफांनी त्याविरोधात उच्च न्यायालयात धाव घेतली.
न्यायालयाकडून दिलासा मिळाल्यानंतर मुश्रीफ हे दोन वेळा ईडीच्या मुंबईतील कार्यालयात चौकशीसाठी हजर राहिले आहेत. त्यांना पुन्हा चाैकशीला बोलावण्यात येणार असल्याची माहिती मिळत आहे. दरम्यान, मुश्रीफ यांच्या समर्थनार्थ मोर्चाचे आयोजन करण्यात आले होते. त्यात कोल्हापूरमधील कार्यकर्ते, शेतकरी सहभागी होणार होते. पण त्यांना वेळीच पोलिसांनी ताब्यात घेतले
